თურმანიძეების ოჯახის ფართომასშტაბით გაცნობის მიზნით, გამგეობის ორგანიზებით დღეს ფოტოსესია სოფელ გარეტყეში გაიმართა. ფოტოხელოვანის - მარია ზოიძის ნამუშევარს გამგეობა მალე ალბომად გამოსცემს. ასევე ფოტომასალა განთავსდება სხვადასხვა ჟურნალში და სოციალურ ქსელში. მასალის დოკუმენტურად აკინძვას შეეცადა სტუმარი საფრანგეთიდანაც. აღსანიშნავია, რომ თურმანიძეების ოჯახის შთამომავლობა ძირითადად ხელოვნების მიმდევრები არიან, განსაკუთრებით სასიმღერო ტრადიციის, რომელიც საუკუნეზე მეტს ითვლის. მათ შთამომავლობას მიეკუთვნება ცნობილი კომპოზიტორი და ლოტბარი რევაზ თურმანიძე და აჭარაში პირველი ფოლკლორული ანსამბლის წევრი გურამ თურმანიძე. თურმანიძეების ოჯახმა შემოინახა მერისის ხეობისათვის დამახასიათებელი არაერთი ფოლკლორული სიმღერა. ისინი ყოველწლიურად მასპინძლობენ როგორც საქართველოს, ასევე უცხოურ ფოლკლორულ ჯგუფებს.