,,სამართლიანი არჩევნებისა და დემოკრატიის საერთაშორისო საზოგადოება“ (ISFED) ევროკავშირის ფინანსური მხარდაჭერით, პროექტის ,,თვითმმართველობის არჩევნების შესახებ ცნობიერების ამაღლება ადგილობრივი სამოქალაქო ორგანიზაციებისა და თვითმმართველობების ჩართულობით“ ფარგლებში, დღეს ქედაში საჯარო მოხელეებისათვის სემინარი გაიმართა, რომელსაც მუნიციპალიტეტის პირველი პირები და თვითმმართველობის მოხელეები ესწრებოდნენ. პროექტის მიზანი შესაბამისად, ადგილობრივი თვითმმართველობის არჩევნების შესახებ საზოგადოების ცნობიერების ამაღლებაა. სემინარი მოიცავდა ისეთ თემებს, როგორიცაა ადგილობრივი თვითმმართველობის არჩევნების მნიშვნელობა, ადგილობრივი თვითმმართველობის უფლებამოსილება წინასაარჩევნო პერიოდში, ადმინისტრაციული რესურსის არამიზნობრივი გამოყენება, ამომრჩევლის მოსყიდვა და ა.შ. სემინარს უძღვებოდნენ ,,სამართლიანი არჩევნების“ აჭარა-გურია-ფოთის რეგიონული ხელმძღვანელი მადონა ბერიძე და ამავე ორგანიზაციის ქედის კოორდინატორი ვლადიმერ თებიძე.