,,ნარჩენების სწორი მართვით შევინარჩუნებთ ბუნებრივ გარემოს" - ეს სახელწოდება საინფორმაციო კამპანიას ქედაში მცხოვრებმა ახალგაზრდებმა შეურჩიეს, რომლის მიზანიც მოსახლეობის ცნობიერების ამაღლება, უკანონო ნაგავსაყრელების აღმოფხვრა, დაბინძურებული კერების დასუფთავება და ბუნკერულ სისტემაზე გადასვლაა. დაბინძურებული კერების ფოტოკოლაჟი, თემატურად შერჩეული სიმღერები, ახალგაზრდების მესიჯები ნახატზე და ტრანსფარანტებზე, ნაგვის ურნებზე, ქუჩებში...- შევინარჩუნოთ სუფთა გარემო! - სწორედ ამ სლოგანის ქვეშ გაერთიანდნენ ქედის გამგეობის ახალგაზრდობის ცენტრის ბენეფიციარები და რუსთაველის ქუჩაზე მდებარე პარკიდან, სადაც პარალელურ რეჟიმში ქედის კომუნალურსერვისის მიერ დასუფთავების აქცია მიმდინარეობდა, სხვადასხვა სახის აქტივობები გამართეს. შთამბეჭდავი იყო ქედის საჯარო სკოლის მე-7 კლასის მოსწავლის ლაშა შავიშვილის მიერ პროექტში ,,green camp" გამოცდილების გაზიარება, რომლის ფარგლებშიც თანამოაზრეებმა გასულ წელს თანატოლებში ცნობიერების ამაღლების მიზნით ფლაერები გამოსცეს. დღესვე ახალგაზრდებმა დაბის მაცხოვრებლებს გამგეობის საზოგადოებასთან ურთიერთობის განყოფილების მიერ გამოცემული საინფორმაციო ფლაერები კარდაკარის პრონციპით დაარიგეს.