არსამთავრობო ორგანიზაცია ,,დახმარების ეროვნულ ფონდს" - NAF-სა და ქედის მუნიციპალიტეტის გამგეობას შორის გაფორმებული ურთიერთთანამშრომლობის მემორანდუმის ფარგლებში, მარტიდან ქედაში ახალი პროგრამა ,,სოციალურად დაუცველ ხანდაზმულთა შინმოვლის სერვისების უზრუნველყოფა" ამოქმედდა. პროგრამა საწყის ეტაპზე სატესტოა და მასში 9 ბენეფიციარია ჩართული. მოხალისეობრივ საქმიანობებს - ფიზიკურ, ინფორმაციულ თუ მორალურ დახმარებას, მათთან ახლოს მცხოვრები გამგეობაში დასაქმებული 6 მოხელე კვირაში ერთხელ ეწევა, თუმცა მათთან ვიზიტი მათივე სურვილისამებრ უფრო ხშირია. ამ ეტაპზე ხანდაზმულებთან შეთავაზებული სერვისების განხორციელება აქტიურ ფაზაშია. უახლოეს დღეებში დაგეგმილია საჭირო და აუცილებელი ინვენტარის გადაცემა მოხუცებისთვის, რაც დახმარებას გაუწევთ გადაადგილებაში და საზოგადოებასთან ინტეგრაციაში. პროგრამაში ჩართულმა ხანდაზმულებმა განსაკუთრებული სითბო და სიხარული გამოხატეს მოხალისეების მიმართ. პროექტი ქედაში ევროკავშირის (EU) ფინანსური მხარდაჭერით, „საქართველოს არბაითენ სამარიტელთა ბუნდი“-სა და ადგილობრივ ხელისუფლებასთან პარტნიორობით ხორციელდება.