ქედის გამგეობის განათლების, კულტურის, ტურიზმისა და ძეგლთა დაცვის განყოფილების მიზნობრივი პროგრამის ფარგლებში, დღეს მორიგი ტურისტული ლაშქრობა გაიმართა. უძველესი ბილიკი აგარიდან პირველ მაისამდე, ისტორიული მიწის ხიდი, ცივასულას ციხე, ასევე ძველი ბილიკით მახუნცეთის ჩანჩქერის სათავიდან ულამაზესი პანორამა, ჩანჩქერი, თამარის ხიდი - ეს ის მარშრუტია, 30-მდე ქედელმა ახალგაზრდამ ფეხით რომ განვლო. პროგრამის მიზანია, მომავალი თაობისთვის ისტორიული ქედის გაცნობა, ტურისტული პოტენციალის გათავისება და ბუნების საინტერესო ადგილების პოპულარიზაცია. ქედის მუნიციპალიტეტის გამგეობა ბოლო სამი წელია აქტიურად მართავს მუნიციპალიტეტის ტერიტორიაზე სხვადასხვა მიმართულებით ლაშქრობებს, რაც მოსწავლე-ახალგაზრდების წახალისებას, დაინტერესებას და ღირსშესანიშნავი ადგილების გაცნობას ისახავს მიზნად.