ინოვაციური პროექტის - ,,ქედის მუნიციპალიტეტის შშმ პირები - ადგილობრივი „კლიმატის ცვლილების ელჩები" ფარგლებში, ქედის მერიის შშმ პირთა საკითხებზე მომუშავე საბჭოსა და ქედის ადგილობრივი განვითარების ჯგუფს - LAG შორის თანამშრომლობის მემორანდუმი დღეს გაფორმდა.

მემორანდუმს ხელი საბჭოსა და ლაგის თავმჯდომარეებმა - მამუკა ფარტენაძემ და გიორგი აბულაძემ მოაწერეს და სამუშაო ჯგუფთან ერთად, სამომავლო ნაბიჯები განიხილეს.

შეგახსენებთ, რომ პროექტის ძირითადი მიზანი შშმ პირების გარემოს დაცვის სფეროში ჩართვის მიზნით, ეფექტიანი და რეპლიკაციის პოტენციალის მქონე ინიციატივის განხორციელებაა და იმის ჩვენება თუ, როგორ შეიძლება, ხელი შეეწყოს შშმ პირთა თემის სოციალურ-ეკონომიკურ ცხოვრებაში ჩართულობას, გაუმჯობესდეს მათი საარსებო წყაროების მოპოვების შესაძლებლობები და ამასთანავე, მიღწეულ იქნეს გარემოსდაცვითი მიზნები.

პროექტი მრავალმხრივ მიზანს ემსახურება, როგორიცაა ქედის მუნიციპალიტეტის შშმ პირების შესაძლებლობების განვითარება, მათი იმ ცოდნითა და უნარებით უზრუნველყოფა, რომლებიც საჭიროა გარემოსდაცვითი და კლიმატის ცვლილების საკითხების ადვოკატირებისა და სოფლის განვითარების პროცესში ინტეგრაციისათვის; ასევე, პროექტი მიზნად ისახავს, კლიმატის ცვლილების მოსალოდნელი ზემოქმედების მიმართ ქედის მუნიციპალიტეტის მედეგობის გაზრდას.

ინოვაციური პროექტის დონორია: გლობალური გარემოსდაცვითი ფონდის მცირე გრანტების პროგრამა.