მეორე დღეა ქედის თვითმმართველობის წარმომადგენელთათვის, ბავშვთა მიმართ ძალადობის საკითხებზე ტრენინგები იმართება, რომლის მიზანია ბავშვთა დაცვის მიმართვიანობის (რეფერირების) პროცედურებში საკუთარი პასუხისმგებლობების გააზრება და ამ კუთხით ცოდნის გაზრდა. ტრენინგები საქართველოს მთავრობის, ევროკავშირის, გაეროს ბავშვთა ფონდისა და საქართველოს სოციალურ მუშაკთა ასოციაციის ეგიდით ტარდება. იგი დაფუძნებულია მინი ლექციებზე, ჯგუფურ სამუშაოებზე, გონებრივ იერიშზე, შემთხვევათა განხილვაზე, როლურ თამაშებსა და დისკუსიებზე. სამუშაო შეხვედრებისას განიხილავენ ისეთ თემატიკას, როგორიცაა: ბავშვის მიმართ ძალადობის დეფინიცია, ძალადობის ფორმები, კანონმდებლობის მიმოხილვა, მიმართვიანობის პროცედურები, ძალადობის იდენტიფიკაცია, მონიტორინგის მეთოდები და ა.შ. მინი ლექციები ხვალ ოფიციალურად დასრულდება, შედეგად მონაწილეები გაიზიარებენ რეფერირების პროცედურებში მუნიციპალიტეტის როლს, სხვა უწყებებთან თანამშრომლობის გზებს, ასევე ბავშვთა ძალადობასთან და მუნიციპალიტეტის საქმიანობასთან დაკავშირებულ კანონმდებლობას.