ქედის საჯარო სკოლის მეოთხე კლასის მოსწავლეს - ბაჩუკი ბერიძეს, ღვიძლის ტრანსპლანტაცია სასწრაფოდ ესაჭიროება. მას ასევე საყლაპავი ვენების ვარიკოზული გაგანიერება აქვს. ოპერაცია ბელორუსიაში უნდა გაკეთდეს, რისთვისაც 23 000 ლარია საჭირო. ოჯახი სოციალურად დაუცველია და შესაბამისად, გასაწევი ხარჯების საშუალება არ გააჩნია. ბაჩუკის დასახმარებლად უკვე ჩატარებული ოპერაციებისთვის ქედის მუნიციპალიტეტსა და აჭარის რეგიონში არაერთი საქველმოქმედო აქციები გაიმართა. ,,სიკეთე გადამდებია" - ამ დევიზით ქედაში ხელოვანები, მოსწავლეები და საჯარო მოხელეები ბიჭუნას დასახმარებლად კვლავ გაერთიანდნენ. 29 მარტს ქედის კულტურის ცენტრში გაიმართა საქველმოქმედო კონცერტი, რომელშიც ბაჩუკი თავად ღებულობდა მონაწილეობას. ამაღელვებელი იყო მის მიერ დუეტში შესრულებული ,,განდაგანა". პატარა ბიჭუნა კვლავ ჩვენი თანადგომის ამარაა! ერთად გადავირჩინოთ ბაჩუკის სიცოცხლე!