ქედელ ფერმერებს, გამგებლის წარმომადგენლებს და ადგილობრივი თვითმმართველობის მოხელეებს, აჭარის ა რ სოფლის მეურნეობის მინისტრმა ლაშა კომახიძემ დღეს 2017 წელს მიმდინარე და დაგეგმილი პროექტები პრეზენტაციის სახით გააცნო. შეხვედრას ასევე ესწრებოდნენ აჭარის უმაღლესი საბჭოს თავმჯდომარე დავით გაბაიძე, აგრარული და გარემოს დაცვის კომისიის წევრები და მუნიციპალიტეტის პირველი პირები. სიახლის სახით, წელს ქედაში ადგილობრივად წარმოებული პროდუქციის რეალიზაციის ხელშეწყობის პროგრამაა დაგეგმილი, რომელიც მომსახურების ცენტრის შექმნას გულისხმობს. როგორც მინისტრმა განმარტა, აღნიშნულ ცენტრში მოხდება ფერმერის მიერ ნამეტი პროდუქციის პირველადი დამუშავება, შეფუთვა და მისთვის საბაზრო სახის მიცემა. ქვეპროგრამის ბიუჯეტი კი 2 644 540 ლარია. ქედის მოსახლეობა კვლავ ისარგებლებს მაღალეფექტური მრავალწლიანი კულტურების გაშენების ხელშეწყობის პროგრამით. აქედან ქედაში 24 ფერმერზე 2 680 ძირი კაკლის ნერგი გაიცა, რომელიც 8.12 ჰექტარზე გაშენდა. ასევე ფერმერებს შესაძლებლობა აქვთ მონაწილეობა მიიღონ კარტოფილისა და ნიორის სარგავი მასალის პროგრამაში, რომლის ფარგლებში A კლასის ჰოლანდიური სარგავი მასალის გარდა, სასუქი და ჰერბიციდებიც გადაეცემათ. პრეზენტაციის დასასრულს შეხვედრა კითხვა-პასუხის ფორმატში გაგრძელდა. ფერმერების შეკითხვებს სამინისტროს, უმაღლესი საბჭოსა და თვითმმართველობის მოხელეები პასუხობდნენ. მინისტრისა და ქედის გამგებლის ინიციატივით, ქედაში აგრო მარკეტის მშენებლობაც დაანონსდა.