ქედის მუნიციპალიტეტის მერმა მამუკა თურმანიძემ, პირველ მოადგილე იმედა ვასაძესთან ერთად ინფრასტრუქტურული პროექტების ფარგლებში მიმდინარე სამშენებლო სამუშაოები დაათვალიერა.

სოფელ ორცვაში, ძველი სახლის ახლით ჩანაცვლების პროგრამის ფარგლებში, ნონა აბულაძის საცხოვერებელი სახლის სამშენებლო სამუშაოები დაათვალიერა.

პროგრამის მიზანია მუნიციპალიტეტში ავარიული საცხოვრისის მქონე ოჯახების საცხოვრებელი პირობების გაუმჯობესება და უსაფრთხო გარემოს შექმნა, რომელიც ითვალისწინებს თანამედროვე სტანდარტების შესაბამისი ახალი საცხოვრებელი სახლების მშენებლობას, სველი წერტილების მოწყობას, შიდა და გარე სრული სარემონტო სამუშაოების განხორციელებას.

მიმდინარე წელს, პროგრამის ფარგლებში 3 ახალი სახლის მშენებლობა მიმდინარეობს სოფელ დოლოგანში, ორცვასა და პირველ მაისში. აღნიშნული პროექტისთვის ჯამში 372 000 ლარი დაიხარჯება.

ასევე, მეწყერსაწინააღმდეგო ღონისძიებების ფარგლებში, სოფელ ორცვაში გივი ნაკაშიძის და ჯამბულ აბულაძის სახლის მიმდებარედ ფერდსამაგრი კედლის მოწყობის სამუშაოები დაათვალიერა.

აღნიშნული პროგრამის ფარგლებში მიმდინარე წელს სულ 13 ღონისძიება ხორციელდება, რომლის ბიუჯეტი 1 946 600 ლარს შეადგენს.

სამუშაოები მერთან ერთად, ადგილზე დაათვალიერა სივრცითი მოწყობის, არქიტექტურის და მშენებლობის სამსახურის უფროსმა გენადი ანანიძემ და დაბა ქედის ადმინისტრაციული ერთეულის წარმომადგენელმა ქემალ სალაძემ.